ग्लोबल मार्केट न्यूज नेटवर्क/मुंबई, दि. 15 - राज्याचे मुख्यमंत्री उद्धव ठाकरे यांनी गोरेगावमध्ये नेस्को मैदानावर उभारलेल्या कोरोना काळजी केंद्र 2 (CCC-2) (Corona Care Center) व्यवस्थेची आज, शुक्रवारी ( दि. 15) सकाळी पाहणी केली.
यावेळी उद्योग मंत्री सुभाष देसाई, बृहन्‍मुंबई महानगरपालिकेचे अतिरिक्त महानगरपालिका आयुक्त (शहर) संजीव जयस्वाल, सहआयुक्त (विशेष) आनंद वागराळकर आदी उपस्थित होते.
मुख्यमंत्र्यांनी नेस्को मैदानावर सभागृह क्रमांक 2 आणि 3 या ठिकाणी करण्यात आलेल्‍या व्यवस्थेची प्रामुख्‍याने पाहणी केली. अतिरिक्त महानगरपालिका आयुक्त (शहर) जयस्वाल यांनी नेस्को केंद्रावर करण्यात येत असलेल्या तयारीची सविस्तर माहिती दिली.
एकूण 1240 बेड क्षमता असलेले हे संपूर्ण केंद्र असणार आहे. याठिकाणी ऑक्सिजन पुरवठा देखील उपलब्ध असेल. महिला आणि पुरुषांसाठी स्वतंत्र प्रसाधनगृहे आणि स्नानगृहे, गिझर यासह प्रत्येक बेडला स्वतंत्र पंखा देणार आहे.
पुरेसे वैद्यकीय अधिकारी आणि परिचारिका नेमण्यात येणार आहेत. संपूर्ण व्यवस्थेची पाहणी केल्यानंतर मुख्यमंत्र्यांनी या तयारीबाबत समाधान व्यक्त केले आहे.
